अनेक महिला आपल्या बाळांना उपचारांसाठी रुग्णालयात घेऊन येत असतात, पण रुग्णालयात आडोसा नसल्याने बाळांना स्तनपान करणे शक्य नसते. त्यामुळे बाळाची उपासमार होते. त्यामुळे मुंबईतील काही शासकीय रुग्णालयांमध्ये स्तनपान कक्षाची सुविधा उपलब्ध करून देण्यात आली होती. त्याला चांगला प्रतिसाद मिळू लागल्याने महाराष्ट्र राज्य सामाजिक सेवा अधीक्षक संघटनेने शासकीय रुग्णालयांमध्ये स्तनपान कक्ष सुरू करण्याचा निर्णय घेतला आहे.

याबाबत संघटनेचे अध्यक्ष विजय गायकवाड यांनी सांगितले, की मुंबईतील जे. जे. रुग्णालय, सेंट जॉर्ज रुग्णालय, कामा रुग्णालय आणि वांद्रे हेल्थ सेंटरमध्ये आतापर्यंत स्तनपान केंद्रे सुरू करण्यात आली आहेत. यानंतर सातारा सिव्हिल रुग्णालय आणि पालघर सिव्हिल रुग्णालयात स्तनपान कक्षांचे काम करायचे आहे.

चाईल्ड हेल्प फाऊंडेशनच्या माध्यमातून हे केंद्र बांधण्यात येणार आहे. स्तनपान केंद्र सुरू करण्यासाठी रुग्णालय प्रशासनाकडून फक्त जागेची मागणी केली जाते. जागा दिल्यावर संस्था विविध कंपन्यांच्या सीएसआर निधीचा वापर करून त्या ठिकाणी डायमंड रूमची स्थापना करते. या खोलीत महिलेला स्तनपान देण्यासाठी आरामदायी खुर्ची आणि व्हेंटिलेशन देण्याची विशेष काळजी घेतली जाते. या खोलीत एका वेळी १० पेक्षा जास्त माता आपल्या बाळांना स्तनपान करू शकतात, असेही गायकवाड यांनी सांगितले.