दसऱ्याच्या दिवशी वाशी (vashi), खारघर, मानसरोवर रेल्वेस्थानक, खांदेश्वर रेल्वेस्थानक आणि तळोजा या परिसरातील 26 हजार घरांसाठी सिडको मंडळाने सोडत प्रक्रियेला सुरूवात केली. सोडत प्रक्रिया सूरू झाल्यावर विधानसभा निवडणुकीची आचारसंहिता जाहीर झाली. 

या योजनेत पहिल्यांदाच सिडको मंडळाने सोडत प्रक्रियेसोबत इच्छुक अर्जदारांना त्यांची पात्रतेची कागदपत्रं जोडण्याची अट ठेवली होती. यासाठी लागणारी सर्व कागदपत्रं देण्यासाठी अर्जदारांनी मुदत मागितली होती.  

अखेर सिडको मंडळाचे व्यवस्थापकीय संचालक विजय सिंघल यांनी नागरिकांकडून होणाऱ्या मागणीचा विचार करुन 11 डिसेंबरपर्यंत या योजनेतील सोडत प्रक्रियेसाठी अर्जनोंदणीला मुदतवाढ दिली.

‘माझे पसंतीचे सिडकोचे घर’ असे या योजनेचे नाव असून योजनेच्या पहिल्याच दिवशी 12,400 अर्जदारांनी त्यांची नोंदणी केल्याने या योजनेला उंदड प्रतिसाद मिळेल असे बोलले जात होते. मात्र सिडको मंडळाने घरांच्या किंमती गुलदस्त्यात ठेवल्याने इच्छुकांचा हिरमोड झाला.

पुढील वर्षी नवी मुंबई आंतरराष्ट्रीय विमानतळावरून मालवाहू वाहतूक सूरू करण्यासाठी सिडको मंडळाच्या जोरदार हालचाली सुरू आहेत. त्यामुळे सिडकोच्या 26 हजार घरांच्या सोडतीला चांगला प्रतिसाद मिळेल अशी चर्चा आहे.   

आर्थिकदृष्ट्या दुर्बल घटक (EWS) आणि अल्प उत्पन्न  (LIG)  गटातील नागरिक या योजनेसाठी अर्ज भरू शकतील. 6 लाख रुपयांपेक्षा अधिक वार्षिक उत्पन्न असणारे सर्वच नागरीक एलआयजी श्रेणीत या योजनेत अर्ज करत आहेत. वर्षाला 20 ते 30 लाख रुपये उत्पन्न असणाऱ्या नागरिकांनी या योजनेसाठी अर्ज भरले आहेत. 

तळोजा परिसरात प्रदूषणाचा त्रास जास्त असला तरी या परिसरातील 13 हजार घरांचा समावेश या सोडत प्रक्रियेत करण्यात आला आहे. या योजनेत घरासाठी इच्छुक नागरीक सिडको मंडळाच्या https://cidcohomes.com/  संकेतस्थळावर अर्ज करण्यासाठी भेट देऊ शकतील असे आवाहन सिडको मंडळाने केले आहे.

हेही वाचा

मुंबईच्या किमान तापमानात घट

मुंबई पोलिसांतर्फे मतदान केंद्रांजवळ कडेकोट बंदोबस्त