पोलिसांना तातडीने उपचार मिळावेत याकरिता एक स्वतंत्र कोरोना दक्षता कक्ष निर्माण करण्यात आला आल्याची माहिती राज्याचे गृहमंत्री अनिल देशमुख यांनी फेसबुक लाइव्हद्वारे संवाद साधताना दिली.
गृहमंत्री अनिल देशमुख म्हणाले, कोरोना प्रादुर्भावामुळे राज्यातील २ पोलीस बांधवांचा मृत्यू झाला, ही अत्यंत दुःखद व दुर्दैवी घटना आहे. महाराष्ट्र शासन त्यांच्या कुटुंबियांच्या पाठीशी ठामपणे उभे आहे. दोघांच्याही कुटुंबियांना प्रत्येकी ५० लाख रुपयांची मदत व योग्य ती शासकीय नोकरी तसंच नियमानुसार मिळणारी मदत दिली जाईल.
कोरोनाच्या पार्श्वभूमीवर सुरु असलेल्या लढाईमध्ये आपले पोलीस दल अत्यंत कठीण अशा परिस्थितीत काम करत आहे. पोलिसांच्या पाठीशी शासन ठामपणे उभे आहे, असं म्हणत त्यांनी पोलीस कर्मचाऱ्यांना आश्वस्त केलं.
हेही वाचा- कोरोनामुळे मुंबईत पोलिसाचा मृत्यू
कोरोना विशेष कक्ष व नोडल अधिकारी
कोरोना संदर्भात प्रकृतीची कोणतीही तक्रार असलेल्या पोलिसाला वा अधिकाऱ्याला तातडीने उपचार मिळावेत याकरिता एक स्वतंत्र कोरोना दक्षता कक्ष निर्माण करण्यात आला आहे. मुंबईसाठी सहपोलीस आयुक्त नवल बजाज तर महाराष्ट्रासाठी अतिरिक्त महासंचालक संजीव सिंघल यांची नोडल अधिकारी म्हणून नेमणूक करण्यात येत आहे. जिल्हा स्तरावर देखील संबंधित पोलीस आयुक्त व जिल्हा पोलीस अधीक्षक हे अशा प्रकारचे कक्ष निर्माण करतील. तसेच मुंबईमध्ये दोन हॉस्पिटल हे पोलिसांसाठी राखीव ठेवण्यात येतील, अशी माहितीही गृहमंत्र्यांनी दिली.
कोरोना विरुद्धच्या लढाईत आपल्याला कोणत्याही परिस्थितीत विजय मिळवायचा आहे. त्यासाठी समाजातील सर्व घटकांनी सहकार्य करावं, असं आवाहन गृहमंत्र्यांनी यावेळी केलं.
हेही वाचा- सोनिया गांधींवर टीका, अर्णब गोस्वामी यांना चौकशीसाठी मुंबई पोलिसांची नोटीस
Share
Tweet
