Advertisement

मुंबईतील डबेवाल्यांना पालकमंत्र्यांकडून मदतीचा हात

डबेवाल्यांच्या कुटुंबासाठी लाॅकडाऊन संपेपर्यंत रेशनची व्यवस्था करण्याची तसंच त्यांचे इतर प्रश्न येत्या मंत्रिमंडळाच्या बैठकीत मांडण्याचं आश्वासन शेख यांनी यावेळी दिलं.

मुंबईतील डबेवाल्यांना पालकमंत्र्यांकडून मदतीचा हात
SHARES

लाॅकडाऊनमुळे मागच्या २ महिन्यांपासून सरकारी आणि खासगी कार्यालयं बंद आहेत. राज्यात लाॅकडाऊन शिथिल झालं असलं, तरी अजूनही कार्यालयं पूर्ण क्षमतेने सुरू झालेली नाहीत. याच कर्मचाऱ्यांसाठी जेवणाच्या डब्याची ने-आण करणाऱ्या डबेवाल्यांचा रोजगारही यामुळे ठप्प आहे, अशा स्थितीत आर्थिक संकटात सापडलेल्या डबेवाल्यांच्या कुटुंबाला मुंबईचे पालकमंत्री अस्लम शेख यांनी मदतीचा हात दिला आहे. शेख यांच्या हस्ते डबेवाल्यांना २,५०० रेशन किटचं वितरण करण्यात आलं आहे. 

मुंबई महानगरपालिकेच्या पी- उत्तर विभाग कार्यालयात हा रेशन किट वितरणाचा कार्यक्रम आयोजित करण्यात आला होता. यावेळी मुंबई डबेवाले संघटनेचे अध्यक्ष रमेश करोंदे, सहाय्यक प्रवक्ता विनोद शेटे , मेक अर्थ ग्रीन अगेन मेगा फाऊंडेशनच्या अनुशा श्रीनिवासन अय्यर व महानगरपालिकेचे वरिष्ठ अधिकारी उपस्थित होते.

हेही वाचा - मुंबई डबेवाला असोसिएशन डबेवाल्यांच्या मदतीला

लाॅकडाऊन संपेपर्यंत रेशन

यावेळी पालकमंत्री अस्लम शेख म्हणाले, डबेवाले हे मुंबईची दुसरी लाइफलाईन आहेत. डबेवाले १३० वर्षांपासून प्रामाणिकपणे व सचोटीने कार्यालयांमध्ये वेळेवर जेवणाचे डबे पोहोचविण्याचं काम करीत आहेत. लॉकडाऊनमुळे कार्यालयं बंद असल्याने त्यांच्या रोजगारावर मोठा परिणाम झाला आहे. त्यामुळे आर्थिक संकटात असलेल्या डबेवाल्यांच्या कुटुंबासाठी लाॅकडाऊन संपेपर्यंत रेशनची व्यवस्था करण्याची तसंच त्यांचे इतर प्रश्न येत्या मंत्रिमंडळाच्या बैठकीत मांडण्याचं आश्वासन शेख यांनी यावेळी दिलं. चक्रीवादळामुळे पुण्यातील डबेवाल्यांच्या घरांचं नुकसान झालं आहे. नुकसानग्रस्त घरांचे पंचनामे त्वरित करण्याचे आदेश जिल्हाधिकाऱ्यांना दिल्याची माहिती देखील अस्लम शेख यांनी दिली.

२ हजारांची मदत

टाळेबंदीमुळे डबेवाल्यांसमोर उभं राहिलेलं आर्थिक संकट, भविष्यातील या व्यवसायाशी निगडित आव्हाने व प्रश्न आदींविषयी मुंबई डबेवाला संघटनेचे अध्यक्ष रामदास  करोंदे यांनी मंत्री असल्म शेख यांच्यासमोर मांडले. बांधकाम मजुरांना केल्या जाणाऱ्या मदतीच्या धर्तीवर डबेवाल्यांनाही २ हजार रुपयांची मदत करण्याची व चक्रीवादळामुळे नुकसान झालेल्या पुणे जिल्ह्याचे मूळ निवासी असणाऱ्या डबेवाल्यांना त्वरित पंचनामे करुन नुकसान भरपाई देण्याची मागणी संघटनेचे प्रवक्ते विनोद शेटे यांनी केली.

संबंधित विषय
‘मुंबई लाइव्ह’च्या ताज्या बातम्यांसाठी सब्स्क्राईब करा