बृहन्मुंबई महानगरपालिकेने (BMC) मुंबईतील क्लीन अप मार्शलच्या सेवा 4 एप्रिलपासून बंद करण्याचा निर्णय घेतला आहे. मात्र, त्यानंतरही क्लीन अप मार्शल रस्त्यावर दिसल्यास किंवा दंड आकारून मुंबईकरांकडून पैसे उकळण्याचा प्रयत्न केल्यास, त्यांनी विभाग कार्यालयात तक्रार करण्याचे आवाहन पालिकेने केले आहे.
स्वच्छ मुंबई अभियानांतर्गत मुंबईत नियुक्त करण्यात आलेल्या क्लीन अप मार्शलच्या सेवा 4 एप्रिलपासून समाप्त करण्याचा निर्णय पालिकेच्या घनकचरा व्यवस्थापन विभागाने घेतला आहे, अशा सूचना पालिका आयुक्त भूषण गगराणी यांनी पालिका प्रशासनाला दिल्या आहेत.
मात्र, 4 एप्रिलनंतर या 'क्लीन अप मार्शल'कडून दंड वसूल होत असल्यास नागरिकांनी संबंधित प्रशासकीय विभागाशी (वॉर्ड ऑफिस) संपर्क साधावा, असे आवाहनही बीएमसी प्रशासनाने केले आहे.
कचरा टाकणाऱ्या नागरिकांना दंड करण्यासाठी बीएमसीने मुंबईतील सर्व 24 प्रशासकीय विभागात क्लीन अप मार्शल नियुक्त केले होते.
प्रत्येक प्रशासकीय विभागात 12 वेगवेगळ्या संस्थांमार्फत 30 क्लीन अप मार्शल नियुक्त करण्यात आले. या योजनेच्या अंमलबजावणीसाठीचे नियम व तत्त्वेही मांडण्यात आली. मात्र, मार्शल विविध नियमांचे उल्लंघन करत असल्याच्या अनेक तक्रारी बीएमसी प्रशासनाकडे आल्या होत्या. त्यामुळे मुंबईतील स्वच्छतेसाठी नियुक्त करण्यात आलेल्या क्लीन अप मार्शल्सचा करार 4 एप्रिलपासून रद्द होणार आहे.
मात्र, ‘स्वच्छ मुंबई मिशन’ची अंमलबजावणी सुरूच राहणार आहे. यासाठी महापालिका लवकरच कार्यवाही करणार असल्याचे उपायुक्त (घनकचरा व्यवस्थापन) किरण दिघावकर यांनी सांगितले.
क्लीन-अप मार्शल्सच्या विरोधात तक्रारी
याशिवाय, बायोमेट्रिक हजेरीबाबत उदासीनता, नियम मोडणाऱ्या नागरिकांकडून विहित दंडापेक्षा अधिक दंड वसूल करणे, त्यांच्या नियुक्त क्षेत्राबाहेर तपासणी करणे आणि कराराचा भाग नसलेली हॉटेल, बँक्वेट हॉल, होर्डिंग्ज, फलक यांसारख्या ठिकाणी दंड आकारणे असे प्रकार समोर आले आहेत.
करारातील अटी व शर्तींचे पालन न करण्याबरोबरच या कारवाईची बाब बीएमसीच्या निदर्शनास आणून देण्यात आली आहे. शिवाय, गेल्या वर्षभरात क्लीन-अप मार्शलच्या अव्यावसायिक वर्तनामुळे नागरी संस्थेच्या प्रतिष्ठेवर नकारात्मक परिणाम झाला आहे.
हेही वाचा
Share
Tweet
