मुंबईसह आसपासच्या परिसरातील अनेक भागांत पावसाळ्यात जास्तीचा पाऊस झाल्यास मुंबईची तुंबई होते. शिवाय काही सखल भागांत पाणी साचल्यानं रस्ते वाहतूक विस्कळीत होते. मात्र, पावसाळ्यात पाणी तुंबून पूरपरिस्थिती निर्माण होऊ नये, मुंबईची तुंबापुरी होऊ नये, यासाठी मुंबई महापालिकेनं अर्थसंकल्पात भरघोस तरतूद केली आहे.
पर्जन्य जलवाहिन्यांचं जाळं सुधारण्यासाठी कामं हाती घेण्यात आली आहेत. ५८ कामांपैकी ४० कामं पूर्ण झाली असून, १५ कामं प्रगतिपथावर आहेत. ३ कामं लवकर सुरू केली जाणार आहेत. भायखळा येथील पूरपरिस्थिती हाताळण्यासाठी डॉ. बाबासाहेब आंबेडकर रोड ते रे रोडपर्यंत काम हाती घेण्यात आलं आहे. दादर येथील पाणी साचण्याचे प्रमाण कमी करण्यासाठी दादर टी.टी. आणि मंचेरजी जोशी रोडवरील पर्जन्य जलवाहिन्यांच्या क्षमतेमध्ये वाढ करण्याचं काम प्रगतिपथावर आहे.
एम.जी. रोडपासून लिंक रोडपर्यंत पोईसर नदी वळविणे आणि रुंदीकरणाचं ५० टक्के काम पूर्ण झालं आहे. काम पूर्ण झाल्यानंतर कांदिवली येथील डहाणूकरवाडी परिसराला पूर परिस्थितीपासून दिलासा मिळणार आहे. शिवडीमधील पूरपरिस्थिती दूर करण्यासाठी मुंबई पोर्ट ट्रस्ट परिसरातील रेनॉल्डस कॉलनी इथं नलिका टाकण्याचं काम प्रस्तावित आहे. प्रतीक्षानगर इथं पेरिफेरल नाला वळविणं आणि नाल्याच्या रुंदीकरणाचं काम प्रस्तावित आहे.
मालाड येथील पावसाच्या पाण्याचा निचरा पोईसर नदीत वेगानं होण्यासाठी महेश्वरी नाला वळविण्यासह रुंदीकरणाच्या कामासाठी निविदा मागविण्यात आल्या आहेत. उघड्या नाल्यातून थेट समुद्रात कचरा वाहून जाऊ नये म्हणून इर्ला आणि लव्हग्रोव्ह नाला याठिकाणी बॅक रेक स्क्रीनसाठी ५० कोटींची तरतूद आहे.
हेही वाचा -
पेट्रोल-डिझेल दरवाढीविरोधात शिवसेना करणार राज्यव्यापी आंदोनल
महापालिकेकडून बेस्टला केवळ ७५० कोटींचे अनुदान
Share
Tweet
