कल्याण, डोंबिवली शहरांना पाणी पुरवठा करणाऱ्या मुख्य जलवाहिन्यांमध्ये काही तांत्रिक बिघाड आहेत. काही ठिकाणी जलवाहिन्यांमध्ये हवेचे (एअर) प्रमाण अधिक आहे. त्यामुळे काही भागाला पुरेशा दाबाने पाणी पुरवठा होत नाही.

डोंबिवली पश्चिमेत गणेशनगर भागात हा प्रश्न अनेक महिन्यांपासून सुरू आहे. काही भागात कमी दाबाने पाणी पुरवठा होत असल्याच्या नागरिकांच्या तक्रारी आहेत. त्या भागातील भूमिगत जलवाहिन्यांची तपासणी या बंदच्या काळात केली जाणार आहे, असे कार्यकारी अभियंता शैलेश मळेकर यांनी सांगितले.

कल्याण विभागाचे पाणी पुरवठा (water supply) विभागाचे कार्यकारी अभियंता अशोक घोडे, डोंबिवली विभागाचे कार्यकारी अभियंता शैलेश मळेकर यांच्या नियंत्रणाखाली ही देखभाल दुरुस्तीची कामे केली जाणार आहेत. या पाणी पुरवठा बंदच्या कालावधीत बारावे, मोहिली, नेतिवली येथील जलशुध्दीकरण केंद्रेही बंद राहणार आहेत.

या कालावधीत शहराच्या प्रत्येक भागात पुरेशा दाबावाने पाणी पुरवठा झाला पाहिजे यादृष्टीनेही ही जलवाहिन्या दुरुस्तीची कामे हाती घेण्यात आली आहेत, असे कार्यकारी अभियंता घोडे यांनी सांगितले.

शुक्रवारी दिवसभर पाणी पुरवठा बंद राहणार आहे. त्यामुळे दुसऱ्या दिवशी कमी दाबाने पाणी होण्याची शक्यता आहे. नागरिकांनी एक दिवस पुरेल इतका पाणी साठा घरात करून ठेवावा, असे आवाहन पाणी पुरवठा अधिकाऱ्यांनी केले आहे.

हेही वाचा

आता धोबीघाट PNG वर चालणार

महाराजांच्या किल्ल्यांना UNESCO वारसा मिळण्याची शक्यता