बकरी ईदसाठी नवी मुंबई पालिकेकडून मार्गदर्शक सूचना जारी

कोरोनाच्या पार्श्वभूमीवर मुस्लीम बांधवांच्या बकरी ईद सणासाठी नवी मुंबई पालिकेकडून मार्गदर्शक सूचना जारी करण्यात आल्या आहेत.

मुस्लीम बांधवाकडून बकरी ईद (ईद-उल-अजहा) 21 जुलै रोजी साजरी होत असून या सणानिमित्ताने लहान-मोठ्या जनावरांची कुर्बानी करण्याची प्रथा आहे. कोरोनामुळे उदभवलेल्या परिस्थितीचा विचार करता यावर्षी बकरी ईद साध्या पध्दतीने साजरी करण्याचा निर्णय महाराष्ट‍्र सरकारने घेतला आहे. बकरी ईद साजरी करण्याच्या अनुषंगाने नवी मुंबई महापालिकेने मार्गदर्शक सूचना जारी केल्या आहेत.

मार्गदर्शक सूचना

- महानगरपालिकेच्या मार्गदर्शक सूचनेनुसार साध्या पध्दतीने बकरी ईद साजरी करायची असून प्रतिकात्मक कुर्बानी करण्यात यावी. तसंच कुठेही गर्दी होणार नाही याची दक्षता घ्यावी असं आवाहन महापालिका आयुक्त अभिजीत बांगर यांनी केलं आहे.

- कोरोनामुळे राज्यात सर्व धार्मिक कार्यक्रमांना बंदी आहे. त्यास अनुसरून बकरी ईदची नमाज मस्जिद अथवा ईदगाह अथवा सार्वजनिक ठिकाणी अदा न करता, नागरिकांनी आपल्या घरीच अदा करावी.

- सध्या कार्यान्वित असणारे जनावरांचे बाजार बंद राहतील. नागरिकांना जनावरे खरेदी करावयाची असल्यास त्यांनी ऑनलाईन पध्दतीने अथवा दूरध्वनीवरून जनावरे खरेदी करावी.

- नागरिकांनी शक्यतो प्रतिकात्मक कुर्बानी करावी.

- लागू करण्यात आलेल्या निर्बंधांनुसार आणि त्यानंतर वेळोवेळी निर्गमित केलेल्या सूचनांनुसार इतर निर्बंध कायम राहतील. त्यामध्ये बकरी ईद निमित्त कोणतीही शिथीलता देता येणार नाही.

- बकरी ईदच्या निमित्ताने नागरिकांनी कुठल्याही सार्वजनिक ठिकाणी गर्दी करु नये किंवा एकत्र जमू नये.

- कोरोनाचा प्रादुर्भाव रोखण्यासाठी महानगरपालिकेव्दारे विहित केलेल्या नियमांचे अनुपालन करणे बंधनकारक राहील. तसेच या परिपत्रकानंतर व प्रत्यक्ष सण सुरु होण्याच्या मधल्या कालावधीत अजून काही सूचना प्रसिध्द झाल्यास त्यांचेदेखील अनुपालन करावे लागेल.

- नवी मुंबई महानगरपालिकेव्दारे शहराच्या विविध भागांमध्ये तात्पुरत्या स्वरुपात सामुदायिक कत्तलखान्यांकरीता परवानगी देण्यात येत होती, परंतू यावर्षी तात्पुरत्या स्वरुपात सामुदायिक कत्तलखान्यांकरीता परवानगी देण्यात येणार नाही.