व्हेंटिलेटर धूळखात पडले असल्याचा आरोप चुकीचा, महानगरपालिका प्रशासनाचा खुलासा

मुंबई महानगरपालिकेला पीएम केअर फंडातून प्राप्त झालेले सुमारे ४०० व्हेंटिलेटर वापरात नसून ते धूळखात पडले असल्याचा आरोप केला जात होता. त्यावर आता पालिकेने हे आरोप चुकीचे असल्यचा खुलासा जाहिर केला आहे. केंद्राने पाठवलेले ४४६ व्हेंटिलेटर हे विविध रुग्णालयात रुग्णांच्या उपचारासाठी वितरित करण्यात आले आहेत. याच व्हेंटिलेटरच्या मदतीने रुग्णांवर उपचार सुरू असल्याचे पालिकेने म्हटले आहे.

हेही वाचाः- Jio 5G: पुढच्या वर्षी येणार जिओचं ५ जी नेटवर्क- मुकेश अंबानी

महानगरपालिकेला केंद्र सरकारच्या पीएम केअर फंडातून ४४६ व्हेंटिलेटर पुरवण्यात आले आहेत. हे व्हेंटिलेटर टप्प्या-टप्प्याने प्राप्त झाले आहेत. व्हेंटिलेटर हे विविध कोरोना आरोग्य केंद्र भव्य सुविधांना (जम्बो फॅसिलिटी) तसेच प्रमुख महानगरपालिका रुग्णालये, इतर उपनगरीय रुग्णालयांना वितरित करण्यात आले आहेत. ही व्हेंटिलेटर्स टप्प्या-टप्प्याने प्राप्त होत असताना, संबंधित कंपनीच्या तांत्रिक कर्मचारी व मनुष्यबळाने त्यांची जोडणी व उभारणी करणे आवश्यक असते. ती सतत चालणारी प्रक्रिया आहे. संबंधित कंपन्यांकडून मनुष्यबळ उपलब्ध करुन ही व्हेंटिलेटर्स कार्यान्वित करण्यात येत असून बहुतांश ठिकाणी व्हेंटिलेटर सुरु देखील झाले आहेत. कार्यान्वित करताना या व्हेंटिलेटर्सची चाचपणी देखील केली जाते. त्यामध्ये कोणतीही तांत्रिक पूर्तता करावयाची असल्यास त्याचीदेखील कार्यवाही करावी लागते. या सर्व निश्चित पद्धतीनुसार त्याचे कामकाज सुरु आहे. टप्प्या-टप्प्याने ही व्हेंटिलेटर्स प्राप्त होत असताना त्यांचे संचालन करण्यासाठी प्रशिक्षित व वैद्यकीय मनुष्यबळदेखील नेमावे लागते. ही सर्व कार्यवाही योग्यरितीने होत असताना व्हेंटिलेटर्स धूळखात पडली असल्याचा आरोप हा निराधार असल्याचे पालिकेकडून सांगण्यात आले आहे.

हेही वाचाः- ‘या’ परिसरात साचलं पाणी, पोलिसांनी वाहतुकीसाठी रस्ते केले बंद

तसेच, कोविड १९ विषयक महानगरपालिका प्रशासनाने केलेल्या उपाययोजनांना यश येऊ लागले आहे. याचा परिणाम म्हणून रुग्णसंख्या कमी होत असून यशस्वी उपचार घेऊन घरी परतणाऱ्यांची संख्या आता ७० टक्के इतकी झाली आहे. स्वाभाविकच रुग्णसंख्या कमी झाल्याने विविध रुग्णालये, कोरोना आरोग्य केंद्र यामधील रुग्णशय्या (बेड) रिकाम्या/रिक्त आहेत. कोविड १९ बाधितांवर उपचारासाठी महानगरपालिकेकडे उपलब्ध असलेल्या १ हजार ०५३ व्हेंटिलेटर्सपैकी सुमारे १२५ व्हेंटिलेटरवर आता रुग्ण नाहीत म्हणजे ते रिक्त आहेत. अशा स्थितीत नव्याने प्राप्त झालेल्या व्हेंटिलेटर्सवर रुग्ण दिसत नाही, याचा अर्थ ते धूळखात पडले आहेत, असे म्हणणे योग्य ठरणार नाही. उलटपक्षी मुंबईतील कोविड १९ संसर्ग नियंत्रणात येत असल्याचे ते निदर्शक आहे, अशी प्रशासनाची भावना आहे. यामुळे व्हेंटिलेटर्स धूळखात पडल्याच्या व अनुषांगिक आरोपांमध्ये कोणतेही तथ्‍य नसून हे आरोप पालिकेने फेटाळून लावले आहे.