गेल्या काही महिन्यांमध्ये बेकायदेशीरपणे बांधकामाचा ढिगारा टाकणाऱ्यांचे प्रमाण वाढले आहे. याविरोधात आता कारवाईचा बडगा उचलण्यात येत आहे.
मुंबईतील (mumbai) बोरिवली पश्चिमेला असणाऱ्या झाशीची राणी तलाव परिसरात एक्सार मेट्रो स्टेशनजवळील भूखंडावर देखील असाच ढिगारा टाकण्यात आला आहे. याप्रकरणी मुंबई महापालिकेच्या (bmc) आर मध्य विभाग कार्यालयाने कडक कारवाई केली आहे.
झाशी येथील राणी तलाव परिसरात सीटीएस क्रमांक 1548 या जागेवर बेकायदेशीरपणे (illegal) अतिक्रमण करून जमिनीवर बांधकाम केले जात आहे. याप्रकरणी संबंधितांना महापालिकेने नोटीस बजावली आहे. तसेच पालिकेकडून 90 हजार रुपयांचा दंडही ठोठावण्यात आला आहे.
याबाबतची माहिती महापालिकेच्या उत्तर विभागाला मिळाल्यानंतर महापालिका प्रशासनाने जागा मालकाविरुद्ध पोलिस ठाण्यात तक्रार दाखल केली. तसेच त्याच्यावर पालिका कायद्यान्वये कारवाई सुरू करण्यात आली आहे.
या भूखंडावर इमारतीचे बांधकाम सुरू आहे. त्यासाठी कोणतीही परवानगी न घेता भूखंडावर रस्ता तयार केला जात होता. तसेच इतर भूभाग सपाट करून इमारतीसाठी जमीन तयार करण्यात येत होती.
याप्रकरणी महापालिका प्रशासनाने एमआरटीपी कायद्यांतर्गत मालकाला नोटीस पाठवली आहे. तसेच पालिका प्रशासनाकडून एमएचबी पोलिस ठाण्यात तक्रारही दाखल करण्यात आली आहे. या भूखंडावर यापुढे अतिक्रमण होऊ नये यासाठी आर मध्यवर्ती विभाग कार्यालयाकडून विशेष पथक नेमण्यात आले आहे. याशिवाय मालकाकडून 90 हजार रुपयांचा दंडही वसूल करण्यात आला आहे.
यासंबंधी पालिका प्रशासनाकडून वाहतूक पोलिसांनाही या प्रकरणाची माहिती देण्यात आली आहे. अनधिकृत डंपर (dumper) वाहनांचा परवाना रद्द करण्याचा आदेशही पालिकेने दिला आहे.
हा संपूर्ण भूखंड सध्या महापालिकेच्या घनकचरा विभागाच्या देखरेखीखाली असल्याचे महापालिकेच्या आर मध्य विभागाच्या सहाय्यक आयुक्तांनी सांगितले आहे.
हेही वाचा
Share
Tweet
