140 कोटी रुपयांच्या बनावट व्यवहारांचा समावेश असलेल्या बनावट जीएसटी इनव्हॉइस रॅकेटचा पर्दाफाश करण्यात आला आहे. मंगळवारी सीजीएसटी मुंबई झोन अंतर्गत ठाणे केंद्रीय वस्तू आणि सेवा कर (सीजीएसटी) आयुक्तालयाच्या अधिकाऱ्यांनी ही कारवाई केली.

बनावट जीएसटी देयकांच्या आधारे 140 कोटी रुपयांची ही करचोरी होत होती. या प्रकरणी मीरा रोड येथून एका व्यक्तीला अटक करण्यात आली आहे. अटक करण्यात आलेल्या व्यक्तीची ओळख पटली असून त्याचं नाव कपाडिया मोहम्मद सुल्तान असं आहे.

विशेष म्हणजे 26 कोटी 92 लाखांच्या करचोरीचा तपास करताना हे एवढ्या मोठ्या प्रमाणातील आकडे आणि करचोरीचं प्रकरण उजेडात आलं आहे. 

या प्रकरणी सुरुवातीला 26 कोटी 92 लाख रुपयांची चोरी समोर आली होती. त्यासंबंधी अधिक तपास केला असता मुख्य आरोपी सुल्तान हा 18 बनावट कंपन्यांच्या नावे देयके तयार करुन जीएसटीचा परतावा घेत असल्याचे दिसून आले. अशा बनावट परताव्यांचा आकडा 140 कोटी रुपये इतका होता.

हा एवढा मोठा घोटाळा करण्यासाठी सुल्तानने आधार कार्ड, पॅनकार्डसह अन्य दस्तावेजांचा गैरवापर केला होता. हे कार्ड विविध व्यक्तींच्या नावे होते. त्यांच्या नावे बनावट कंपन्या उघडून जीएसटीचा परतावा स्वतःच्या खात्यात घेतला जात होता.

सुल्तानला न्यायालयाने 14 दिवसांची न्यायिक कोठडी सुनावली आहे. बनावट कागदपत्रांच्या मदतीने अशाप्रकारे करचोरी करणाऱ्यांविरोधात जीएसटी विभागाकडून अधिक तपास सुरू आहे. सध्या पोलीस सुल्तानची चौकशी करत असून यामध्ये त्याला इतर कोणी मदत केली याचा शोध घेतला जात आहे.

हेही वाचा

शाळेच्या आवारात मुलीला अज्ञाताकडून इंजेक्शन दिल्याची तक्रार

पंतप्रधानांच्या दौऱ्यावरून मुंबई पोलिसांना धमकीचा फोन