'बोगदा' या सिनेमाच्या शीर्षकावरून, प्रेक्षकांकडून या चित्रपटाबाबत अनेक तर्कवितर्क केले जात होते. मात्र, मुंबईत नुकत्याच पार पडलेल्या सिनेमाच्या ट्रेलर लाँच कार्यक्रमात या सर्व तर्कवितर्कांना पूर्णविराम मिळाला आहे.
नितीन केणी प्रस्तुत 'बोगदा' या सिनेमाचा ट्रेलर 'इच्छा मरण' या विषयावर भाष्य करतो. आई आणि मुलीच्या नात्यावर आधारित आहे. ज्येष्ठ अभिनेत्री सुहासिनी जोशी यांनी साकारलेली आजारी आई आणि मृण्मयी देशपांडेने साकारलेली लेक या दोन प्रमुख व्यक्तिरेखांभोवती हा सिनेमा बेतला असल्याचं ट्रेलर पाहिल्यावर जाणवतं. रोहित कोकाटेचीदेखील या सिनेमात महत्वपूर्ण भूमिका आहे.
आईचं आजारपण आणि स्वतःच्या महत्वाकांक्षा यामध्ये गुरफटलेली गरीब सामान्य मुलगी आणि आजाराला कंटाळून तिच्याकडे मरणाची केविलवाणी मागणी करणारी आई या सिनेमाच्या ट्रेलरमध्ये पाहायला मिळते. जन्म आणि मृत्यू या जीवनातील दोन अटळ घटकांवर या सिनेमाचा ट्रेलर भाष्य करतो. आईच्या इच्छेखातर तिला स्वेच्छामरण देण्याचा कठीण विचार एखादी मुलगी करू शकेल का? हा प्रश्न 'बोगदा' सिनेमाच्या ट्रेलरमुळे उपस्थित होतो.
'इच्छा मरण' या मुद्द्यावर समाजात अनेक वैचारिक मतभेद असून, खऱ्या आयुष्यात अशक्यप्राय असलेला हा मुद्दा 'बोगदा' सिनेमामुळे पुन्हा एकदा चर्चेत येणार आहे. त्यामुळे, या सिनेमात नेमकं काय पाहायला मिळणार ते ७ सप्टेंबरला समजेल. या सिनेमाचं दिग्दर्शन आणि लेखन निशिता केणी यांनी केलं असून, करण कोंडे, सुरेश पानमंद, नंदा पानमंद यांसोबत त्यांनी सिनेमाच्या निर्मितीची धुरादेखील सांभाळली आहे.
हेही वाचा -
काळजात घंटी’ वाजवणारं सुव्रत-प्राजक्ताचं गाणं
‘परी हूँ मैं’ चित्रपटाचा ट्रेलर लाँच
Share
Tweet
