गुटखा विक्रेत्यांवर कठोर कारवाई करणार - अजित पवार

कर्करोगासारख्या आजाराला कारणीभूत ठरणार्‍या गुटखा व त्या अनुषंगिक उत्पादनांवर शासनाने यापूर्वीच बंदी घातली आहे. तथापि, अजूनही अवैध मार्गाने विक्री होतांना आढळून येत आहे. अशा अवैध मार्गाने गुटखा विक्री करणार्‍या विक्रेत्यांवर शासन कठोर कारवाई करणार असल्याचे प्रतिपादन उपमुख्यमंत्री अजित पवार यांनी केले. बारामती येथील गिरिराज हॉस्पिटल आणि जैन सोशल ग्रुपच्या संयुक्त विद्यमाने मोफत कर्करोग निदान, शस्त्रक्रिया व किमोथेरपी शिबिराचे आयोजन करण्यात आले होते

हेही वाचाः- 'इतक्या' महिला चालक एसटी सेवेत होणार दाखल

जागतिक आरोग्य संघटनेच्या यादीनुसार जगामध्ये कर्करोग हा दुसर्‍या क्रमांकाचा आजार असून या आजारामुळे मोठ्या संख्येने नागरिक मृत्युमुखी पडत आहेत, ही चिंतेची बाब आहे. हवामानबदल,आहारातील बदल तसेच ग्रामीण भागातून शहराकडे नागरिकांचे मोठय़ा प्रमाणात होणारे स्थलांतर आदी कारणांमुळे कर्करोगाच्या प्रमाणात वाढ होत आहे. तथापि, कर्करोग झालेल्या रुग्णांनी घाबरु नये, वेळीच औषधोपचार घ्यावेत, रोज सकस व प्रथिनेयुक्त आहार घ्यावा. या गोष्टीचे महत्त्व लक्षात घेता आरोग्य या विषयासाठी चालू वर्षाच्या अर्थसंकल्पामध्ये जास्तीत जास्त निधीची तरतूद करण्यात आलेली आहे. त्याच बरोबर वैद्यकीय क्षेत्रात पदव्युत्तर अभ्यासक्रमाकरिता जागांची संख्या वाढविण्यात आलेल्या आहेत. जनतेचे आरोग्य चांगले राहण्यासाठी वैद्यकीय सुविधा निर्माण होणे आवश्यक आहेत. नागरिकांनी शासनामार्फत देण्यात येणार्‍या विविध आरोग्य विषयक योजनांचा लाभ घ्यावा, असे आवाहन त्यांनी केले.

हेही वाचाः- मेट्रोनंतर रेल्वे-एसटी करोनासाठी सज्ज

या पूर्वी ही विधानसभेत अजित पवारांनी सुंगधीत सुपारी आणि गुटख्याची विक्री करणाऱ्यांविरोधात पोलिसांना कडक पाऊले उचलण्याचे आदेश दिले होते. त्याच बरोबर शाळा आणि महाविद्यालय परिसराच्या शंभर मीटर आत गुटख्याची विक्री करणाऱ्यांचे परवानेच रद्द करण्याचे आदेश पोलिसांनी अन्न व प्रशासन विभागाला दिले आहेत.