माहिम विधानसभा मतदारसंघातून ठाकरे गटाचे उमेदवार महेश सावंत (Mahesh Sawant) यांचा विजय झाला आहे. तर मनसे अध्यक्ष राज ठाकरे यांचा मुलगा अमित ठाकरे यांचा पराभव झाला आहे. 

माजी मुख्यमंत्री आणि ठाकरे गटाचे प्रमुख उद्धव ठाकरे यांनी महेश सावंत यांना माहीममध्ये भगवा फडकलाच पाहिजे, असा आदेश दिला होता. त्यानंतर महेश सावंत यांनी शिवसेना शिंदे गटाचे उमेदवार सदा सरवणकर (Sada Sarvankar) आणि राजपुत्र अमित ठाकरे (Amit Thackeray) यांचा दारुन पराभव करत माहीममध्ये बाजी मारली.

अमित ठाकरेंना मनसेकडून उमेदवारी जाहीर झाल्यापासून माहीम विधानसभा मतदारसंघाची महाराष्ट्रात चर्चा सुरू होती. अमित ठाकरे निवडणुकीच्या रिंगणात उतरल्याने महायुतीकडून पाठिंबा दिला जाईल, अशी शक्यता होती. परंतु सदा सरवणकरांनी माघार घेण्यास नकार दिला.

तसेच आपण माघार घेतल्यानंतर त्याचा थेट फायदा ठाकरे गटाच्या महेश सावंत यांना होईल, असं भाकित सदा सरवणकर यांनी व्यक्त केलं होतं. सदा सरवणकरांनी माघार घ्यावी, यासाठी स्वत: एकनाथ शिंदे, देवेंद्र फडणवीसांनी प्रयत्न केले. मात्र महायुतीच्या या सर्व नेत्यांना अपयश आले. त्यानंतर माहीममध्ये तिरंगी लढत रंगली आणि यामध्ये आज महेश सावंत यांनी बाजी मारली.

हेही वाचा

'बॅलेट पेपरवर पुन्हा निवडणुका घ्या' : संजय राऊत