मुंबईसह राज्यभरातील एसटी प्रवाशांसाठी खुशखबर आहे. कारण आता, एसटी प्रवाशांसाठी आरोग्यदायी असलेल्या जेनेरिक औषधालय सुरू होणार आहे. एसटी महामंडळाच्या वर्धापन दिनी म्हणजेच १ जून रोजी पहिल्या टप्प्यातील ५० एसटी स्थानकांवर जेनेरिक औषधालय सुरू करण्यात येणार आहेत. तब्बल अडीच वर्षांनंतर स्वस्त दरात एसटी स्थानकांवर प्रवाशांसह गरजूंना औषधं मिळण्यास सुरुवात होणार आहे.
५० एसटी स्थानकांवर पहिल्या टप्प्यात जेनेरिक औषधालय सुरू करण्यात येणार आहे. तसंच, उर्वरित एसटी स्थानकांवर टप्प्याटप्प्यानं ही योजना सुरू करण्यात येणार आहे. परळ, कुर्ला-नेहरु नगर, मुंबई सेंट्रल, पनवेल ही एसटी बसस्थानकं शहराच्या मध्यवर्ती भागात असल्यानं एसटी प्रवाशांसह सर्वसामान्य प्रवाशांना देखील या योजनेचा लाभ मिळणार आहे.
एसटी स्थानकांतील जेनेरिक औषधालयांसाठी जागेची अडचण होती. मात्र, यासंदर्भात चर्चा करून चर्चेअंती तोडगा काढण्यात आला असून एसटी स्थानकांत १३० स्क्वेअर फूट जागा जेनेरिक औषधालयांसाठी देण्याचे आदेश महामंडळानं परिपत्रकाद्वारे संबंधित एसटी विभागाला दिले आहेत.
प्रधानमंत्री भारतीय जनऔषधी योजनेंतर्गत ही योजना सुरू होणार आहे. बाजारातील महागड्या औषधांच्या तुलनेत जेनेरिक औषधं सुमारे ४० टक्के स्वस्त असतात. दरम्यान, २०१६ मध्ये एसटी महामंडळाकडून जेनेरिक औषधालयं सुरू करण्याची घोषणा करण्यात आली होती. परंतु, जाचक अटींमुळं औषधालयांच्या निविदा प्रक्रियेला जुलै २०१८ मध्ये कंपन्यांनी प्रतिसाद दिला नाही. तसंच, जानेवारी २०१९ मध्ये औषधालयांसाठी जागेची अडचण आल्यामुळं योजना रखडत होती. मात्र, अखेर जागेचा प्रश्न निकाली निघाल्यामुळं औषधालय सुरू होण्याचा मार्ग मोकळा झाला आहे.
हेही वाचा -
दक्षिण मुंबईतील क्रॉफर्ड मार्केटमध्ये आग
मिलिंद देवरांविरोधात आचारसंहिता भंगाचा गुन्हा दाखल
Share
Tweet
