मुंबईसह राज्यात अनेक ठिकाणी कचऱ्याची वेगवेगळ्या पद्धतीत विल्हेवाट लावण्यात येते. त्यामुळं राज्यातही कचऱ्याची विल्हेवाट लावण्याच्या पद्धतीमध्ये सुधारणा होणे गरजेचे आहे. तसंच, अनेक ठिकाणी कचरा जाळण्याच्या घटना घडतात. यामध्ये प्लास्टिकपासून, जैववैद्यकीय कचऱ्यापर्यंत अनेक गोष्टी असतात. यामुळे प्रदूषणाचे प्रमाण वाढत आहे. त्यामुळं पर्यावरणाची होणारी हानी टाळण्यासाठी आवाज फाऊंडेशनने पर्यावरणमंत्री आदित्य ठाकरे यांना पत्र लिहून या समस्येवर उपाययोजना आवश्यक असल्याचे नमूद केले आहे.
आवाज फाऊंडेशनने सन २०१६पासून पनवेल, धरमतर, पोयनाड, चोंडी, मुंबई-अलिबाग रस्त्यावर, अलिबाग शहरामधील कचरा विल्हेवाट लावणाऱ्या केंद्रामध्ये तसेच भिवंडी, काल्हेर या ठाणे जिल्ह्यातील काही ठिकाणी कचरा जाळण्याच्या घटनांच्या नोंदी केल्या आहेत. संबंधित स्थानिक स्वराज्य संस्थांच्या माध्यमातून कचऱ्याची योग्य विल्हेवाट लावणारी यंत्रणा उपलब्ध नसल्याने कचऱ्याचे ढीगच्या ढीग द्रुतगती मार्ग, रस्त्याच्या कडेला दिसतात. याची योग्यप्रकारे विल्हेवाट न लावता ते जाळले जातात, असं आवाज फाऊंडेशननं म्हटलं आहे.
भिवंडी येथे जाळलेल्या कचऱ्यामुळे अनेक किलोमीटरपर्यंत पीएम २.५ ची पातळी वाढल्याचे समोर आले. ही नोंदणी १ मिनिट, ५ मिनिटे आणि १५ मिनिटांच्या अंतराळामध्ये करण्यात आली होती.
जानेवारी ते डिसेंबर २०२० या काळात ही निरीक्षणे नोंदली गेली. भिवंडीमध्ये कचरा जाळायला सुरूवात केल्यानंतर एका मिनिटाच्या अंतराळाने केलेल्या नोंदणीमध्ये हा स्तर ६१२ पर्यंत दिसला, पनवेल नाका येथे १८२ तर धरमतर येथे १८१ असा नोंदला गेला.
राज्यामध्ये १.४ लाख मृत्यू हे प्रदूषणामुळे होत असल्याचे इंडियन काऊन्सिल ऑफ मेडिकल रिसर्चच्या आकडेवारीनुसार समोर आले आहे. देशात प्रदूषणामुळे झालेल्या मृत्यूच्या आकड्यांमध्ये राज्याचा दुसरा क्रमांक लागतो. केवळ हवेच्या गुणवत्तेच्या निर्देशांकामुळे हवेची गुणवत्ता सुधारणार नाही. त्यासाठी स्थानिक पातळीवर हे प्रदूषण कशामुळे होत आहे हे शोधून त्यावर उपाय आवश्यक आहेत. त्या दृष्टीने स्थानिक स्वराज्य संस्थांच्या मदतीने कृती आराखडा तयार करणे आवश्यक आहे, अशी मागणी या पत्रात करण्यात आली आहे
Share
Tweet
