मुंबई विद्यापीठाने पीएचडी आणि एमफील प्रवेश परीक्षेचं वेळापत्रक जाहीर केलं आहे. एमफील प्रवेश परीक्षा २५ मार्चला तर पीएचडी प्रवेश परीक्षा २६ आणि २७ मार्च रोजी होणार आहे. ॲानलाईन पद्धतीने होणारी परीक्षा एकूण ७९ विषयांसाठी होणार आहे. परिक्षेचं सविस्तर विषयनिहाय वेळापत्रक विद्यापीठाच्या संकेतस्थळावर उपलब्ध करून देण्यात आलं आहे.
मुंबई विद्यापीठातर्फे २७ फेब्रुवारी ते १८ मार्च २०२० दरम्यान पेट परीक्षेसाठी ऑनलाईन अर्ज मागवले होते. त्याला चार वेळा मुदतवाढ देण्यात आली होती. आतापर्यंत विद्यापीठाकडे पेट परीक्षेसाठी ११ हजार ७५९ एवढे अर्ज प्राप्त झाले आहेत. यामध्ये पीएचडी साठी ११ हजार ३५२ तर एमफील साठी ४०७ अर्ज आहेत. यामध्ये पीएचडीसाठी ४ हजार ९१४ एवढे विद्यार्थी असून ६ हजार ४३७ विद्यार्थीनींचा समावेश आहे. तर एमफील साठी १९७ विद्यार्थी आणि २१० विद्यार्थीनींचा समावेश आहे.
पीएचडीसाठी विद्याशाखानिहाय वाणिज्य आणि व्यवस्थापन शाखेसाठी २०७२, मानव्यविद्या ३२९९, आंतरविद्याशाखा ६८९ आणि विज्ञान आणि तंत्रज्ञान विद्याशाखेसाठी ५२९१ एवढे अर्ज प्राप्त झाले आहेत. तर एमफील प्रवेश परीक्षेच्या ४०७ अर्जांपैकी वाणिज्य आणि व्यवस्थापन शाखेसाठी १०१, मानव्यविद्या २३९, आंतरविद्याशाखा २० आणि विज्ञान आणि तंत्रज्ञान विद्याशाखेसाठी ४७ अर्ज प्राप्त झाले आहेत. या दोन्ही परीक्षांसाठी मराहाष्ट्रातून ११ हजार २२ आणि इतर राज्यातून ७३७ अर्ज मिळाले आहेत.
Share
Tweet
