'आम्ही दोघी'या चित्रपटाचे पहिले पोस्टर नुकतेच रिलीज झाले आहे. या पोस्टरमध्ये प्रिया बापट आणि मुक्ता बर्वेची जोडी एका वेगळ्याच अंदाजात दिसत आहे. प्रिया आणि मुक्ताचा हा पहिलाच एकत्र चित्रपट आहे. या पोस्टरमधून दोघींचा एक वेगळा लूक प्रेक्षकांसमोर आला आहे. सहज अभिनयाने प्रेक्षकांच्या मनात या दोघींनीही आपले वेगळे स्थान निर्माण केले आहे.
या पोस्टरमध्ये मुक्ताचा साधा लूक बघायला मिळत आहे. मुक्ताने साधी कॉटनची साडी नेसली आहे. केसांमध्ये गजरा घातला आहे. तर हातात हिरव्या बांगड्या आणि कपाळावर मोठे कुंकू लावले आहे. त्यामुळे 'आम्ही दोघी' या चित्रपटात मुक्ताची भूमिका काहीशी वेगळी असेल असंच दिसतंय. पोस्टरमध्ये दोघीही गोळा खाताना दिसत आहेत.
'आम्ही दोघी'ही आजच्या तरूणींच्या नातेसंबंधाची गोष्ट आहे. चित्रपटात आई-मुलगी, मैत्रीण, बाप-मुलगी, प्रियकर प्रेयसी अशा नातेसंबंधांना स्पर्श केला आहे. तसेच प्रत्येक गोष्टीचा केवळ स्वत:च्या दृष्टिकोनातून विचार न करता समोरच्याच्या दृष्टिकोनातून विचार केला पाहिजे, ही बाब चित्रपटाद्वारे अधोरेखित करण्यात आली आहे.
एव्हरेस्ट एन्टरटेन्मेंट निर्मित 'आम्ही दोघी' हा चित्रपट १६ फेब्रुवारी २०१८ रोजी प्रेक्षकांच्या भेटीला येत आहे. 'आम्ही दोघी' या चित्रपटाद्वारे प्रतिमा जोशी यांनी दिग्दर्शन क्षेत्रात पदार्पण केले आहे. या आधी प्रतिमा जोशी यांची अभिनेत्री, वेशभूषाकार म्हणून ओळख होती. या चित्रपटाची पटकथा आणि संवाद भाग्यश्री जाधव हिने लिहिले आहेत.
Share
Tweet
