नव्या सुधारित वेतन धोरणानुसार एसटी महामंडळानं मुंबई विभागातील १ हजार ६७२ एसटी कर्मचाऱ्यांचा पगार दिला आहे. 'जितके दिवस काम, तितके दिवस दाम' या तत्त्वानुसार पगार देण्यात आल्यानं संपात सहभागी असलेल्या राज्यातील ७३ हजार कर्मचाऱ्यांना पूर्ण पगार मिळालेला नाही.
सेवाज्येष्ठतेप्रमाणे पगारवाढ नसल्यानं अनेक कर्मचाऱ्यांच्या पगारात कमी-अधिक वाढ झाली आहे. यामुळं ८ ते ९ वर्षे काम करणाऱ्या एसटी कर्मचाऱ्यांचा पगार १२ ते १३ वर्षे काम करणाऱ्या कर्मचाऱ्यांच्या तुलनेत अधिक आहे.
अनेक कर्मचारी या प्रकरणी वरिष्ठांकडे तक्रार करून यावर तोडगा काढण्यासाठी आग्रही आहेत. मुंबई विभागातील हजेरीपटानुसार एकूण कर्मचारी संख्या १,७२२ इतकी आहे. यात चालक-वाहकांची संख्या १,०५३ इतकी आहे. सध्या १,०३१ कर्मचारी संपात सहभागी असून ४४५ कर्मचारी कामावर हजर आहेत.
काही कर्मचाऱ्यांना पूर्ण पगार, तर काही कर्मचाऱ्यांना अंशतः पगार देण्यात आला आहे. एकही दिवस हजर न झालेल्या कर्मचाऱ्यांना पगार देण्यात आलेला नाही, असं महामंडळाकडून स्पष्ट करण्यात आले.
एसटी कर्मचाऱ्यांचा पगार कमी असल्यानं १ ते १० वर्षांमधील कर्मचाऱ्यांना ५ हजार, ११ ते २० वर्षांमधील कर्मचाऱ्यांना ४ हजार आणि २१ ते ३० वर्षांदरम्यान २५०० रुपये अशी वाढ देण्यात आली आहे. ही पगारवाढ मूळ पगारामध्ये आहे.
मंगळवारअखेर राज्यातील ९२ हजार २६६ कर्मचाऱ्यांपैकी ७२ हजार २७१ कर्मचाऱ्यांनी संपात राहण्याचा निर्णय कायम ठेवला आहे. ४ हजार ३५९ चालक-वाहकांसह एकूण १९ हजार ९९५ कर्मचारी कामावर हजर झाले आहेत.
मंगळवारी दुपारी ३ वाजेपर्यंत २५०पैकी १२३ आगारांमध्ये वाहतूक सुरू झाली आहे, असा दावा एसटी महामंडळाने केला. पगारवाढीनंतरही संपात सहभाग घेतलेल्या तसेच योग्य कारणाशिवाय सुट्टी घेणाऱ्या एसटी कर्मचाऱ्यांची विभाग नियंत्रकांकडून चौकशी करण्यात येणार आहे.
निलंबन, बडतर्फी, बदली, मेस्माचा धाक, निवृत्ती वेतन रोखण्याची धमकी या प्रकारांनंतर आता विभागीय चौकशीचा ससेमिरा संपात सहभागी झालेल्या एसटी कर्मचाऱ्यांच्या मागे लावण्यात येणार असल्याचे दिसून येत आहे.
Share
Tweet
