नवी मुंबईला उरण शहराशी जोडणाऱ्या सीवूड-उरण या महत्त्वाकांक्षी प्रकल्पाचा खारकोपरपर्यंतचा१२ किमीचा पहिला टप्पा पूर्ण करण्यात आला आहे. त्यामुळे या मार्गावरील पहिल्या पाच स्थानकांपर्यत लोकल सेवा सुरू करण्याची तयारी रेल्वे प्रशासनाने दर्शविली आहे. तसंच याबाबतीत सिडकोला कळवण्यात आले असून पुढील महिनाभरात या मार्गावरील खारकोपर स्थानकापर्यंत लोकल सेवा सुरू होण्याची शक्यता वर्तवण्यात आली आहे. सिडकोनं जुलै १९९७ मध्ये नेरूळ-उरण या २७ किमी लांबीच्या रेल्वे मार्गाचा प्रस्ताव तयार केला होता.
अखेर जून २०१२ पासून या प्रकल्पाच्या प्रत्यक्ष कामाला सुरुवात करण्यात आली. सिडको आणि रेल्वे यांच्या संयुक्त सहकार्याने उभारण्यात येत असलेल्या या मार्गावर १० स्थानकं आहेत. या संपूर्ण प्रकल्पाचा खर्च दोन हजार कोटींच्या घरात आहे. या संपूर्ण मार्गावर चार उड्डाणपूल बांधण्यात येणार असून या मार्गावरील पाचव्या क्रमांकाच्या खारकोपर स्थानकाचे काम प्रगतिपथावर आहे. त्यापुढील चार किलोमीटरच्या पट्ट्यात खारफुटी आणि भूसंपादनाचा अडथळा निर्माण झाल्याने हे काम रखडले होते. पण, आता हा अडथळाही दूर झाल्याने पुढील टप्प्यासाठी सिडकोनं कंबर कसली आहे.
नेरुळ-उरण या मार्गावरील तिसऱ्या क्रमांकाच्या तरघर स्थानकाचं काम अद्याप प्राथमिक अवस्थेत आहे. पण, लोकल थांबवण्याइतपत स्थानकाचे काम पूर्ण झालेले आहे. असे असले तरी या स्थानकावर लोकलला थांबा द्यायचा की हे स्थानक वगळून थेट चौथ्या क्रमांकाच्या बामणडोंगरी स्थानकावर लोकल थांबवायची याबाबत चाचपणी सुरू असल्याची माहिती सूत्रांकडून देण्यात आली आहे. तरघर हे भव्य आणि दिव्य रेल्वेस्थानक ठरणार आहे. या स्थानकासाठी तब्बल ११२ कोटी रुपये खर्च केले जाणार आहेत.
शिवडी-न्हावाशेवा सी-लिंक या प्रकल्पाला जोडला जाणारा कोस्टल रोड तरघर स्थानकाला लागूनच असलेल्या पामबीच मार्गाला जोडला जाणार आहे. तसंच आंतरराष्ट्रीय विमानतळाजवळील खांदेश्वर स्थानकापासून नियोजित तरघर स्थानकादरम्यान स्कायट्रेन सुरू करण्याची योजना आहे. त्यामुऴे दक्षिण मुंबईतून नवी मुंबईत येण्यासाठी तरघर हे केंद्रबिंदू ठरणार आहे. तर, स्थानकाच्या पहिल्या मजल्यावर प्रशस्त वाहनतळ प्रस्तावित करण्यात आले आहेत.
नेरूळ-उरण मार्गावर एकूण १० रेल्वे स्थानकं आहेत. यात नेरूळ-सीवूड्स, सागरसंगम, तरघर, बामणडोंगरी, खारकोपर, गव्हाण, रांजणपाडा, न्हावा-शेवा, डोंगरी आणि उरण या स्थानकांचा समावेश आहे. सध्या पहिल्या टप्प्यातील पाच स्थानकापर्यंतचे काम पूर्ण झाले आहे. पण, तांत्रिक अडचणीमुळे मार्च २०१८ चा मुहूर्त टळला असून पुढील महिनाभरात पहिल्या पाच स्थानकांपर्यंत लोकल सेवा सुरू करण्याचा निर्णय रेल्वे आणि सिडकोने घेतला आहे.
हेही वाचा -
Share
Tweet
